جديد مدونتنا

إبــحــث عن كتــــاب

جارٍ التحميل...

الاثنين، 14 أيلول، 2009

نص الألف خمسمية..زياد الرحباني

نص الألف خمسمية
أنشالله بينعاد عليكم من الألفين وستة، للألفين وستين.. و.. سبعين. لأنو في قصص، بتضلها هيه ذاتها. مثلاً
كلمة بينعاد عليكم. هلق مش مقصود ينعاد عليكم السنة اللي فاتت للجميع.. لأ طبعاً. بينعاد عليكم بس الأشياء اللي ما بتتغير. مثل مثلاً <<نص الألف خمسمية>>. موافقين؟ شكراً. ليك: مش ضروري تضل تشرح شي لناس معتبرين حالهم بيعرفوه. لا بل بيعرفوا كل شي. مش ضروري تضلّ تحاول تترجم لأشخاص موضوع مش هاممهم بلغتو الأساسية. مش ضروري تضل تعمل إشارات لناس.. عم يتطلعوا على غير محل يا خيي.. ليك: مش ضروري تضل سهران على جماعة ناموا من زمان وبالعلامة في واحد منهم قشط راسو بصحن التبولة. روح. ضهار، تمشّى..أستأجر بسكلات... (موسيقى)بكرة بيكبروا الولاد وبيخففوا تدريجياً الكاتشب. فحاج تخوتي عليهن وتسفقي فيهون يا ماما. بكرة بيكبروا الولاد وبيعرفوا انو الهمبرغر الطيب داخللو كاوتشوك: حاج تفنجري فيهم! بكرة بيكبروا الولاد وبيعرفوا أنو البطاطا أحسن وأطيب من الفريت. وبيعرفوا انو بعد ما في شوكولا ع لوبية ورز. وأنو اللوبية تعتبر غداء ، والشوكولا رح يضلوا شوكولا. ونص الألف.. خمسمية. بالنهاية بيعرفوا إنّك بتحبيهون وانك أمهم ومنّك مرا مهسترة ع الكاتشب، وساحبة عليهم الحنجور ومحتجزتون بالمطبخ. يعني لوقتها. هلق عم قلك كل شي انو بكرة بكرة.. أيه مش انو بكرة يعنيحاول عموماً انو تبتسم للناس معليش. هيدي لا ع الكهربا ولا ع البطارية. لا ع البنزين ولا ع المازوت. شغلة ما رح تزيد شي ع مصروفك. مصروفك عم يطلع من شي تاني. أكد عليه. أنا مش كل مرة خبروني نكتة وضحكت، كانت النكتة بتضحك. أنو طيب شو؟ بدك تعمل مشكل ع نكتة بايخة؟ صدّقني في عندك مشاكل كثيرة صدّقني، واهم. أضحك. أضحك لأّنا بايخة(..)قلتلي مش عم تفهم شي من الوضع حتى ولو قريت الجريدة. إيه نكبة .. مش هم. خليك عم تقرا الجريدة حتى ولو مش عم تفهم شي بالوضع. خليك.. ثابر ع الجريدة لأنو هيدي وسيلتك الوحيدة حتى ما تفهم شي وحجتك معك. يعني بتكون مواطن متابع رصين راصد كل التفاصيل بأدق الأمور وما عم تفهم شي. طبعاً. هيدا مصدر قوتك. في ناس بعدن لهلق وبعد الألفية اجلّك، بيدفعولك وما بيعرفوا ياخدو منك وصل. وإذا ذكرتون بيقولولك <<خلص يا شيخ>>. أنو شي منيح؟ لأ. بس هني مناح. تصور انو حضرتك تجي يوما ما تتزعرن على هولي بالذات ت تعلمون الأصول، تبع الوصل. له!! في ناس أصولون اهم من الأصول. الأصول انعملت على أصلن.(..) مدام لور: أرجوك وما تفهميني غلط (ضحك)، مدام لور: انت عم تاكلي بالسر صحيح، بس.. عم تنصحي بالعلن! بليز افهميني. كلي ع راحتك مدام لور: شو فيها؟ (ضحك) وقدامنا. له يا خيي مزبوطة هلق الحكيم ع راسي الحكيم، بس انو شو بيتمنالك الحكيم؟ انو تضلك متل النمر يعني؟ ما في ما بدو يشتغل هوي كمان. والمستشفى شو بالله؟ انو المستشفى بتتمنى تظل فاتحة ليل نهار وهالعالم عم تتغندر حولها مثل الأحصنة؟ ما.. أيه أذا بتشلي امك ع جنب بيطلع آخرة النهار انو ما في إلا هول جماعة التأمين هني اللي بيتمنولك كل خير. ما تدقك شوكة. شو بعملك؟ بس مزبوطة. طيب انو هالختيار يا بيي اللي ميطأ كل النهار بزاوية بالمطبخ: طيب ما بيخصّنا هيدا يا بيي؟ ما جدك هيدا شو باك وله! وانو إذا كل يومين أو تلاتة رمى لو حكمة او شي على وعظة عن الاخلاق. شو فيها ولا بيي؟ أسمعها. حط لها كاتشب واسمعها. كلها ع بعضها مع صفناتو بين كلمة وكلمة بتطلع لها دقيقة. يحرق سماك ما بتحضرلك مية دعاية ونصيحة بالنهار. هلق دعاية جدك ما فيها إخراج ولا نسوان عم تلمع ولا سيارات عم تفرقع.. وناقصها ألوان طيب. بس بالمقابل هالزلمة ما بدو يشرّيك شي أو يغشك بشي. عم يحكي عموما بالأخلاق ومن المطبخ تنقول. شو انو هوي وكيلها الحصري؟ لأ. انو حيطلعلوا عليها شي أذا مشيت؟. لأ. أسمعلو انت أنت وماشي لوين ما كان. بكرة بيموت جدك وبتبقى انت والدعايات.(..)بس تمرق ع دكان أبو احمد، طبيعي يعدّ الأغراض مرتين ويقلك خمس غراض أحد عشر ألف وخمسمية. ليك لا قَوْى تتمسخر ع أبو احمد. 17 هلق. مع انو بس يموت الواحد ما بياخد معو شي: هيك علمونا. في ناس ما زالوا عم يخبوا ويضبوا. الأرجح مش قاطعين الامل. وبرأيي أنو أكيد مش بسبب الإيمان. هني رأيون ربما أنو هلق وع مضض بعد ما بيقدر ياخد معو شي الواحد. بس من هلق ولوقت ما هني يتوفوا، إلا ما يلتقى شي طريقة بالعلم بالتكنولجيا ياخد الواحد معو مش بس شي، ياخد معو كل شي. بس لوين؟ وكيف؟ وبأي طابق هالجماعة؟ شحن ما شحن تخليص بوالص. ولشو رح يعوزوهم؟ وبأي منطقة؟ ما بعرف. ما هو اللي بيبقى هيك منو قاطع الأمل.. هوي مفروض يعرف. انت بهالوقت عيش. وإذا معك قرش، قرش واحد، أعمل جهدك تصرفو خلال هالحياة الجارية. مالقرش نصو نص قرش.. كل حياتي كنت علق اهمية كبيرة على صلاحية كل غرض أشتريه. كثير مهم هالشي بالنسبة لألي. من فترة بطلت. بطلت لأنو لاحظت انو كل شي عم أشتريه تاريخ صلاحيتو أبعد بكثير من تاريخ صلاحيتي... انا والبلد. يعني شاري اجلّك مرهم صالح للألفين وتسعة! عم فوت عالأوضة طلعوا بوجي بطاريات عم يضاربو عليه هوليك طالعين للألفين واتناعش! أووووف. كثير. كثير كثير. يعني صاير عم جيب أشيا تاريخ صلاحيتها مؤسفة فعلا! مادي منيح لأنو ألها مستقبل. تعا نفكر بتاريخ صلاحيتنا خيي شو رأيك؟ مش معقول نظل نفكر من هلق لشهر وشهرين لقدام ماكسيموم. علبة اللبنة صالحة لشهر وله! واحد وتسعين. لحظة خليك معي: أيه مدام لور.. واللهي سمعتك. عم تقوليلي ما عم يزبط معك ولا حكيم. وانا عم قلك أزبطلك (ضحك) يعني بليز ما تفهميني.. مش مصدقتيني؟ ما عم يزبط معك ولا حكيم... الله بيحبك بيكون. انجح شي انت مدام لور بتكوني بالسوسيتي!! رايح جايي بهالمكتب، وفي ورقة واقعة بين طاولتين، وع الرايح والجايي، اللي هوي انت، عم تشوفا وعم تنسّم. طيب ما.. شيلها. هلق مش انت موقعها، عال. بس ما حدا عم يشيلها. وصار ألها يومين وهاليوم بيصيرو تلاتة. يعني رأي: شيلها وارتاح. لأنو اولا: لو حدا بدو يشيلها كان شالها. تانيا: هيدا بيأكد انو إذا سألت مين موقّعها؟ ما حدا رح يقول. تالتا أكيد ما حدا بهيك مكتب مسموم من الورقة قدك. رابعا مين ما كان موقعا الله لا يردو، الله لا يقيمو. منيح هيك. خامسا (بغضب) وقفلي هالموسيقى يا خيي. خامسا مش ضروري الواحد ما يلم ورقة إلا إذا هوي موقعها. خاصة إذا سامتو وما عم يشيلا ورايح جاي. سادسا بهيك مكتب في احتمال كبير انو ما حدا يلاحظ أن حدا شالها. ولا حدا يعلقلو وسام برتبة كوماندور مجهول او مقبول. سابعا: بهالوقت اللي عم نحكي فيه.. كنت شلتها. وبعدين انا عم يخبروني، ثامنا أذا بدك، انو انت مع التغيير ومع تطهير الأدارات وأعادة الهيكلة والبناء وحرية الراي وحرية وسيادة واستقلال واشيا كثيرة، وموعود بمساعدات دولية للبنان. هلق اوكي ما دخل.. شيلك من هالاشيا.. بس بالأول (تأهّب) شيلها.. الورقة الورقة..
زياد رحباني

نص الألف خمسمية 1

نص الألف خمسمية 2


‏ليست هناك تعليقات:

المشاركات الشائعة

إخترتنا لكم